Tradisjonen tru, vil det under NORDLEK i Arendal i 2024 bli arrangert eit nordisk ball, der ein dansar eit utval av turdansar; kvadriljar, rekkedansar og pardansar, frå kvart av dei fem nordiske landa.

Danserepertoaret er sett, og fram mot stemnet tilbyr Noregs Ungdomslag v/Anders Kirkhus og Erik Hestnes, kurs i desse dansane.

I haust er det sett ned eit instruktørteam som har tatt på seg å reise ut og halde kurs. For å få best mogleg utbytte av eit kurs i desse dansane, bør ein helst vere minimum åtte par på kurset. Det kan vere fornuftig å legge opp til eit helgekurs, gjerne fleire grupper i samarbeid med kvarandre. Instruktørane tilbyr kurs utan å ta honorar, men vertskapet må betale for kurslokale, nødvendig overnatting, mat og billigaste reise tur/retur heimstad for instruktørane. 

Viss du eller laget ditt ønsker meir informasjon om dette kurstilbodet, ta kontakt med Erik Hestnes (erik@trollfaret.no) eller Anders Kirkhus (anders.kirkhus@sintef.no). De kan også ta kontakt med folkedansrådgivaren på NU-kontoret på telefon 24 14 11 14.

Trykk her for å lese det Erik Hestnes skriv om kurset

Helga 18.-19. november blir det grunnleggande instruktørkurs i Ørsta.

Instruktør: Inga Myhr
Musikar: Sigrid Stubsveen

I samarbeid med Ørsta Ungdomslag inviterer vi til grunnleggande instruktørkurs i Ørsta helga 18.-19.november 2023. Instruktørkurset går over 12 timar laurdag og sundag.

På kurset vil du lære eit repertoar av dansar, du får grunnleggande kunnskap om folkedanssjangeren og du lærer metodar for å lære bort og leie dans. Kurset er praktisk lagt opp og instruktøren vil ta utgangspunkt i ulike dansar for å gi deltakarane verktøy til korleis lære vekk folkedans til andre. Kurset legger også opp til refleksjon, erfaringsutveksling og diskusjon. 

For påmelding og meir informasjon, gå til denne sida. 

Kurset er støtta av Studieforbundet kultur og tradisjon.